चौतारा : चाडपर्वको समयमा हुन सक्ने रगतको अभावलाई मध्यनजर गर्दै सिन्धुपाल्चोकको चौतारामा रक्तदान कार्यक्रम आयोजना गरिएको छ । कार्यक्रममा ७ महिलासहित ३४ जनाले रक्तदान गरेका छन् ।
असोज २३ गते शुक्रबार चौतारा टुँडिखेलस्थित फल्चामा आयोजित कार्यक्रममा स्थानीय रक्तदाताहरूले उत्साहपूर्वक सहभागिता जनाएका थिए । दशैँ, तिहारजस्ता ठूला चाडपर्वका बेला दुर्घटना तथा अन्य आकस्मिक स्वास्थ्य समस्याका कारण रगतको माग बढ्न सक्ने भएकाले रगतको उपलब्धता सहज बनाउने उद्देश्यले कार्यक्रम आयोजना गरिएको हो ।
चाडपर्वको समयमा नियमित रक्तदान कार्यक्रम कम हुन सक्ने र बिरामीलाई आवश्यक पर्ने रगतको आपूर्तिमा समस्या आउन सक्ने अवस्थालाई ध्यानमा राख्दै रक्तदान कार्यक्रमलाई महत्त्वपूर्ण रूपमा हेरिएको छ ।
कार्यक्रममा महिला र पुरुष गरी ३४ जनाले रक्तदान गरेर मानवीय सेवामा योगदान दिएका छन् । रक्तदानबाट संकलित रगतले आवश्यक परेका बिरामीको उपचारमा सहयोग पुग्ने अपेक्षा गरिएको छ ।
रक्तदान जीवन बचाउने महत्त्वपूर्ण कार्य भएकाले स्वस्थ व्यक्तिहरूलाई नियमित रक्तदानमा सहभागी हुनसमेत प्रेरित गरिएको छ ।
