काठमाण्डौँ ।
भरत पराजुली सिन्धुपाल्चोक क्षेत्र नम्बर १ बाट राष्ट्रिय स्वतन्त्र पार्टी (रास्वपा) का तर्फबाट उम्मेदवार बनेर लोकप्रिय मतका साथ विजयी भएपछि एकाएक राष्ट्रिय राजनीतिको केन्द्रमा उभिएका छन् । परम्परागत रूपमा नेकपा एमाले, नेपाली कांग्रेस जस्ता ठूला दलका उम्मेदवारको चर्चा भइरहे पनि देशमा आएको ‘नयाँ लहर’ले मतदाताको मन जित्यो, जसको प्रतिफलस्वरूप घण्टी चिन्हमा २४ हजारभन्दा बढी मत खसेर पराजुलीले विजयको झण्डा गाडे ।
यो जित केवल एक उम्मेदवारको जित मात्र होइन, पुराना राजनीतिक शैलीप्रति जनतामा बढ्दो असन्तुष्टि र नयाँ विकल्पप्रतिको विश्वासको संकेत पनि हो । यही सन्देशलाई आत्मसात गर्दै पराजुलीले पार्टीको क्लोज क्याम्पमा सहभागी भई अनुशिक्षण लिएका छन् । राष्ट्रिय स्वतन्त्र पार्टीले नयाँ सरकार गठनका लागि तीव्र तयारी गरिरहेको सन्दर्भमा उनले पनि भावी जिम्मेवारीबारे छलफलमा सहभागिता जनाएका छन् ।
तर, उनको दृष्टिकोण अन्य नेताभन्दा केही फरक देखिन्छ । उनी पद वा सुविधाभन्दा जिम्मेवारी र योगदानलाई प्राथमिकता दिन्छन् । ‘जुनसुकै जिम्मेवारी आयो भने पनि अनुभवका आधारमा स्वीकार गर्छु, तर कुनै विशेष पदकै लागि आग्रह छैन,’ उनले स्पष्ट पारेका छन् ।
अझ रोचक पक्ष के भने, उनले राज्यबाट प्राप्त हुने सेवा–सुविधा नलिने घोषणा गरेका छन् ।
प्रेस पाना डटकमसँगको भेटमा उनले आफू आर्थिक रूपमा सक्षम रहेको कारण सांसदका रूपमा पाउने पारिश्रमिकलाई दुर्गम गाउँका गरिब नागरिकको सेवामा खर्च गर्ने चाहना राखेको बताए । विशेषगरी ग्रामीण महिलाको सुरक्षित सुत्केरीका लागि आवश्यक पूर्वाधार निर्माणमा लगानी गर्ने उनको प्रतिबद्धता सामाजिक उत्तरदायित्वको उदाहरणका रूपमा देखिन्छ ।
यतिमात्र होइन, मन्त्री भए पनि सरकारी गाडी प्रयोग नगर्ने उनको भनाइले राजनीतिक संस्कारमा नयाँ बहस जन्माएको छ । ‘सरकारले दिने सवारी साधनभन्दा उन्नत साधन म आफैसँग छ,’ भन्ने उनको भनाइले सार्वजनिक स्रोतको सदुपयोग र नैतिकता सम्बन्धी सन्देश दिन्छ ।
सिन्धुपाल्चोकको मांखा गाउँमा जन्मिएका पराजुली ग्रामीण किसान परिवारबाट आएका हुन् । आफ्नै व्यवसायबाट वार्षिक करोडौँ आम्दानी गर्ने उनी जलविद्युत क्षेत्रमा समेत लगानीकर्ता हुन् । आर्थिक रूपमा सबल भएकै कारण उनले राज्यको सुविधा लिनु आवश्यक नठानेको बताउँछन् ।
भरत पराजुलीको उदय केवल नयाँ अनुहारको आगमन मात्र होइन, राजनीतिक संस्कारमा सम्भावित परिवर्तनको संकेत हो । सुविधा त्यागेर सेवामा केन्द्रित हुने उनको घोषणा व्यवहारमा कत्तिको रूपान्तरण हुन्छ, त्यो आगामी दिनले देखाउनेछ । तर अहिलेका लागि भने उनले नेपाली राजनीतिमा एउटा फरक सन्देश भने अवश्य दिएका छन् । राजनीति केवल शक्ति र सुविधा प्राप्तिको माध्यम होइन, समाजप्रति उत्तरदायित्व वहन गर्ने एउटा अवसर पनि हो भन्नेमा मान्यता उनीमा देखिन्छ ।
